duniya tiri raunaq se main ab uub raha huun
tu chand mujhe kahti thi main duub raha huun
ab koi shanasa bhi dikhai nahin deta
barson main isi shahr ka mahbub raha huun
main khvab nahin aap ki ankhon ki tarah tha
main aap ka lahja nahin uslub raha huun
rusvai mire naam se mansub rahi hai
main khud kahan rusvai se mansub raha huun
sachchai to ye hai ki tire qarya-e-dil men
ik vo bhi zamana tha ki main khuub raha huun
us shahr ke patthar bhi gavahi miri denge
sahra bhi bata dega ki majzub raha huun
duniya mujhe sahil se khadi dekh rahi hai
main ek jazire ki tarah duub raha huun
shohrat mujhe milti hai to chup-chap khadi rah
rusvai main tujh se bhi to mansub raha huun
phenk aae the mujh ko bhi mire bhaai kuen men
main sabr men bhi hazrat-e-ayyub raha huun
Leave a Reply