Bechain Jo Rakhti Hai Tumhein Chah Kisu Ki

bechain jo rakhti hai tumhen chaah kisu ki

shayad ki hui kargar ab aah kisu ki

us chashm ka ghamza jo kare qatl-e-do-alam

goshe ko nigah ke nahin parvah kisu ki

zulfon ki siyahi men kuchh ik daam the apne

qismat ki hui raat vo tankhvah kisu ki

kya masraf-e-beja se falak ko hai sarokar

vo shai kisu ko de jo ho dil-khvah kisu ki

duniya se guzarna hi ajab kuchh hai ki jis men

koi na kabhu rok sake raah kisu ki

chhine se gham-e-ishq shakebai o aram

ai dil ye padi lutti hai bungah kisu ki

Leave a Comment