haidar-ali-aatish

Dil Shahid-E-Rah-E-Daman Na Hua Tha So Hua

dil shahid-e-rah-e-daman na hua tha so hua

tukde tukde jo gareban na hua tha so hua

barq be-nur hai us rukh ki chamak ke aage

alam-e-nur ka insan na hua tha so hua

rone par mere hua hans ke vo gul sharminda

ghuncha saan sar-ba-gareban na hua tha so hua

main ne rangin na kiya us ka tadap kar daman

sar-e-jallad pe ehsan na hua tha so hua

ho gaya dekh ke qaazi bhi taraf-dar us ka

be-gunah khun-e-musalman na hua tha so hua

har zaban par miri rusvai ka afsana hai

nuskha-e-shauq pareshan na hua tha so hua

araq-aluda jabin dekh kai dil Duub gaya

shabnam-e-bagh se tufan na hua tha so hua

qatl kar ke mujhe talvar ko toda us ne

khun-e-nahaq se pasheman na hua tha so hua

yaar ke ru-e-kitabi ki karun kya tarif

baad quran ke jo quran na hua tha so hua

aansu ankhon se nikalta hai so chingari hai

parda-e-dil se numayan na hua tha so hua

atish-e-ishq se hai daagh sarapa mera

aadmi sarv-e-charaghan na hua tha so hua

gard-e-rah ban ke hua sandal-e-peshani-e-yar

zarra khurshid-e-darakhshan na hua tha so hua

pahron hi misraa-e-sauda hai rulata ‘atish’

tujhe ai dida-e-giryan na hua tha so hua

More Poems

Leave a Comment