mere andar vo mere siva kaun tha
main to tha hi magar dusra kaun tha
log bhi kuchh ta.aruf karate rahe
mujh ko pahle hi malum tha kaun tha
log andaze hi sab lagate rahe
vo jabin kis ki thi naqsh-e-pa kaun tha
mujh se mil kar hi andaza hoga koi
vo alag kaun tha vo juda kaun tha
koi jis par na tha mausamon ka asar
baad savan ke bhi vo hara kaun tha
jis ko ahval saara tha malum vo
be-ḳhabar raste men paḌa kaun tha
muntazir jis ki duniya rahi der tak
duur se koi aata hua kaun tha
aa.i jis ki mahak us se pahle kahin
vo savar-e-kamand-e-hava kaun tha
reza reza hi pahchan men tha ‘zafar’
jante the sabhi ja-ba-ja kaun tha
Leave a Reply