Asrarul Haq Majaz
junun-e-shauq ab bhi kam nahin hai
magar vo aaj bhi barham nahin hai
bahut mushkil hai duniya ka sanvarna
tiri zulfon ka pech-o-kham nahin hai
bahut kuchh aur bhi hai is jahan men
ye duniya mahz gham hi gham nahin hai
taqaze kyuun karun paiham na saaqi
kise yaan fikr-e-besh-o-kam nahin hai
udhar mashkuk hai meri sadaqat
idhar bhi bad-gumani kam nahin hai
miri barbadiyon ka ham-nashino
tumhen kya khud mujhe bhi gham nahin hai
abhi bazm-e-tarab se kya uthun main
abhi to aankh bhi pur-nam nahin hai
ba-in sail-e-gham o sail-e-havadis
mira sar hai ki ab bhi kham nahin hai
‘majaz’ ik bada-kash to hai yaqinan
jo ham sunte the vo aalam nahin hai
Leave a Reply