tujh ko aate hi nahin chhupne ke andaz abhi
mire siine men hai larzan tiri avaz abhi
us ne dekha hi nahin dard ka aghaz abhi
ishq ko apni tamannaon pe hai naaz abhi
tujh ko manzil pe pahunchne ka hai da.ava hamdam
mujh ko anjam nazar aata hai aghaz abhi
kis qadar gosh-bar-avaz hai ḳhamoshi-e-shab
koi naala ki hai fariyad ka dar baaz abhi
mire chehre ki hansi rang-e-shikasta mera
tere ashkon men tabassum ka hai andaz abhi
Leave a Reply