Jafar Sahni
zaval-e-umr ke parde men hai hijab kahan
vufur-e-shauq se labrez ab gulab kahan
kiran kiran se fasana hasin likhta tha
chala gaya vo fusun kar-e-afatab kahan
numud-e-sub.h ko deta sada chala aa.e
hamari raat men baaqi hai aisa ḳhvab kahan
har ik qadam pe ḳhirad ke nishan milte hain
tujhe chhupa ke main rakkhun dil-e-ḳharab kahan
sunahre vaqt men reg-e-ravan ye phuul khila
vo qissa pyaar ka le kar ga.e hain ḳhvab kahan
siyah safed ghaTa asman pe phaili thi
par us ke jaal men aaya vo mahtab kahan
taghayyurat zamane ke us ne batla.e
mire saval ke haq men tha vo javab kahan
talash ḳhvab men mere qadam vo leta tha
zaban pe us ki hai ab aap aur janab kahan
sada-e-dard se vaqif dil-e-nafas ‘ja.afar’
koi bata.e ki hota hai dastiyab kahan
Leave a Reply