Peer Akram
gale se shab ko lagaya sahar ke dhoke men
ham aa ga.e hain ḳhud apni nazar ke dhoke men
idhar hai aag ka dariya udhar lahu ki nadi
kahan pahunch ga.e ham rahbar ke dhoke men
kabhi chale the jahan se usi maqam pe hain
the da.eron men ravan ham safar ke dhoke men
fareb-e-husn-e-nazar hai ki sadgi dil ki
hamesha sang chune hain guhar ke dhoke men
abhi to zulmat-e-shab ka tilism baaqi hai
abhi na sham.a bujhao sahar ke dhoke men
faza.en ajnabi begana suraten ‘akram’
kahan ye aa ga.e ham apne ghar ke dhoke men
Leave a Reply