aks ja-ba-ja apni zaat ke girata hai
kaun asmanon se aa.ine girata hai
main ne ruup dhara hai us ki ruuh ka aur vo
mere naqsh hi mere samne girata hai
umr bhar uTha.ega dukh mire bikharne ka
aankh ki bulandi se kyuun mujhe girata hai
sho.ala-e-mohabbat aur ab-e-ashk ai nadan
raushni ko dariya men kis liye girata hai
vo hava ka jhonka bhi mera saḳht dushman hai
shaḳh se jo patte ko zor se girata hai
jazb kar na le ‘ja.afar’ soch lahr ki tujh ko
tu kahan samundar men kankare girata hai
Leave a Reply