tumhare hijr ka anjam ḳhubsurat hai
bahut udaas magar shaam ḳhubsurat hai
phir is ke ba.ad ye rasta kidhar ko jaata hai
ye zindagi to koi gaam ḳhubsurat hai
tu jis tarah se hasin hai zamane bhar se alag
usi tarah se tira naam ḳhubsurat hai
nahin zaruri ki har baat ki vazahat ho
kahin kahin pe ye ib.ham ḳhubsurat hai
main is liye nahin deta safa.i apni ‘vafa’
mire harif ka ilzam ḳhubsurat hai
Leave a Reply