hai dil men ghubar us ke ghar apna na karenge
ham khaak men milne ki tamanna na karenge
kyunkar ye kahen minnat-e-ada na karenge
kya kya na kiya ishq men kya kya na karenge
hans hans ke vo mujh se hi mire qatl ki baten
is tarah se karte hain ki goya na karenge
kya naame men likkhun dil-e-vabasta ka ahval
malum hai pahle hi ki vo va na karenge
ghairon se shakar-lab sukhan-e-talkh bhi tera
har chand halahil ho gavara na karenge
bimar-e-ajal-chara ko gar hazrat-e-isa
achchha bhi karenge to kuchh achchha na karenge
jhunjhlate ho kya dijiye ik bosa dahan ka
ho jaenge lab band to ghaugha na karenge
divar ke gir padte hi uthne lage tufan
ab baith ke kone men bhi roya na karenge
gar samne us ke bhi gire ashk to dil se
kyuun roz-e-jaza khuun ka daava na karenge
kis vaqt kiya mardumak-e-chashm ka shikva
ai parda-nashin ham tujhe rusva na karenge
naseh kaf-e-afsos na mal chal tujhe kya kaam
pamal karenge vo mujhe ya na karenge
us ku men thaharne na diya josh-e-qalaq ne
aghyar se ham shikva-e-beja na karenge
gar zikr-e-vafa se yahi ghussa hai to ab se
go qatl ka vaada ho taqaza na karenge
‘momin’ vo ghazal kahte hain ab jis se ye mazmun
khul jaae ki tark-e-dar-e-but-khana karenge
Leave a Reply