Wafa Ka Zikr Ho Be-Mehri-E-Butan Ki Tarah

vafā kā zikr ho be-mehrī-e-butāñ kī tarah

yahāñ ḳhulūs bhī arzāñ hai naqd-e-jāñ kī tarah

kabhī jo hāl-e-dil-e-ḳhūñ-chakāñ kā zikr chale

sunā.iye unheñ rūdād-e-dīgarāñ kī tarah

saroñ ke chāñd farozāñ haiñ rāh-e-ulfat meñ

chamak rahī hai zamīñ aaj kahkashāñ kī tarah

kisī masīh ke qadmoñ kī āhaTeñ sun kar

salīb jhuum uThī shāḳh-e-āshiyāñ kī tarah

kahāñ se lā.iye rānā.ī-e-ḳhayāl ‘shamīm’

subū-e-dil bhī hai ḳhālī subū-e-jāñ kī tarah

Leave a Comment