Quaiser Khalid
jo parind ḳhvahishon ke kabhi ham shikar karte
na gila kisi se rahta na ye dil figar karte
vo ilahadgi yaqinan na yuun iḳhtiyar karte
jo zara bhi uns ham se kabhi rakhte, pyaar karte
thi ḳhamoshi-e-salasil ki bhi shart is liye bhi
kahan ja ke hashr barpa tire jan-nisar karte
hui is qadar nadamat hamen kah ke hal-e-dil ḳhud
na tha ye hamara maqsad unhen sogvar karte
ye faza-e-be-yaqin hi bani rabt men tavazun
na ye rasm-o-rah rahti agar e’tibar karte
na amaan nasib hoti tumhen char-su kabhi phir
kahin ham ravish tumhari agar iḳhtiyar karte
yahan barish-e-sitam se jo lage the zaḳhm un ko
hue bad-havas aise ki kahan shumar karte
na.e ashiqo batao ye kahan ki ashiqi hai
kahin ja ke dil luTate kahin jaan nisar karte
kabhi milte phir na shayad kisi moḌ par bhi donon
isi rah-e-pur-ḳhatar par agar intizar karte
ye jhijhak rah-e-vafa men, ye shikayat-e-taghaful
hamen dhaḌkanon men paate agar e’tibar karte
kabhi deti ham ko mohlat jo ye gardish-e-zamana
tire zor-e-tamkanat par to zarur vaar karte
tiri be-ruḳhi pe sar par na uThate asman gar
ye tu hi bata ki kya phir tire jan-nisar karte
yahi dil-lagi tumhari kisi aah men badalti
jo hamare zaḳhm ginte, kabhi gham shumar karte
na the ham yagana aise ki saval uThta koi
unhen kya gharaz thi ham se jo vo intizar karte
hai ye faḳhr jis pe tum ko vo svad-e-raushni hai
kabhi zulmat-e-zaman bhi kahin taar taar karte
ye jhijhak, lihaz, rutba, ye hudud, ye tavazun
kabhi hal-e-dil batate, kabhi e’tibar karte
sar-e-rah sab utarte, mah-o-aftab-o-anjum
shab-e-tar jagmagati agar intizar karte
vo jo tha amal, usi ka radd-e-amal hai ‘ḳhalid’
na to vo shikar hote na hamen shikar karte
Leave a Reply