Akhtar Saeed Khan
bala-e-tira-shabi ka javab le aa.e
bujhe charagh to ham aftab le aa.e
bikhar ga.e jo kabhi chashm-e-intizar ke rang
is anjuman se ham ik aur ḳhvab le aa.e
ham is zamin pe mizan-e-adl rakhte hain
kaho zamane se fard-e-hisab le aa.e
har ek gham se salamat guzar gaya hai dil
ḳhuda kare ki mohabbat ki taab le aa.e
ga.e the ham bhi in ankhon se mangne kya kya
vahi hua ki bas ik iztirab le aa.e
hamari laghzish-e-paiham ko ra.egan na samajh
ajab nahin ki yahi inqalab le aa.e
na laa.e kuchh bhi ham ashob-e-dahr men ‘aḳhtar’
bas ek hausla-e-iztirab le aa.e
Leave a Reply