jalti hui ruton ke ḳharidar kaun hain
ai paikar-e-ghazal tire bimar kaun hain
ḳhushbu ki sa.aton ke talabgar kaun hain
is zulf-e-mushk-bu ke giraftar kaun hain
kab tak chhupe rahenge azal ḳhamushi ke bhed
shahr-e-sada ke mahram-e-asrar kaun hain
kirnon ki rahguzar pe uḌti hai dhuul si
jo us taraf ga.e hain vo ji-dar kaun hain
sinon men le ke valvala-e-zindagi ki aag
asr-e-ravan se bar-sar-e-paikar kaun hain
sadiyon se muntazir hain sulagti masafaten
asa.ish-e-junun ke talabgar kaun hain
sarmast kar ga.i jinhen apne lahu ki lai
vo arsa-e-nabard ke fankar kaun hain
men to gharib-e-shahr-e-suḳhan huun magar ‘jalil’
farman-rava-e-kishvar-e-iz.har kaun hain
Leave a Reply