ahmad-ali-barqi-azmi

Tum Aa Rahe Ho Ki Ja Rahe Ho

tum aa rahe ho ki ja rahe ho

batao kyon muskura rahe ho

ye kaisa jalva dikha rahe ho

nigah-o-dil men sama rahe ho

karoge kya khaak khana-e-dil

nazar se bijli gira rahe ho

milega kya aisa kar ke tum ko

kyon mujh ko nahaq sata rahe ho

hai aarzi karr-o-far tumhara

ye jashn jo tum mana rahe ho

manaega khair apni kab tak

jise tum ab tak bacha rahe ho

lahu pukarega astin ka

jo qatl kar ke chhupa rahe ho

jahan men kar dega tum ko rusva

jo zulm ‘barqi’ pe Dha rahe ho

More Poems

Leave a Comment