Ahmad Javed
koi jal men khush hai koi jaal men
mast hain sab apne apne haal men
jada-e-shamshir ho ya farsh-e-gul
farq kab aaya hamari chaal men
ek aansu se kami aa jaegi
ghaliban dariyaon ke iqbal men
shola-e-sad-rang ki si kaifiyat
tujh men hai ya tere khadd-o-khal men
ek lamha mera yar-e-ghar hai
is musibat-gah-e-mah-o-sal men
ye jo mere ji ko chain aata nahin
hind men iran men bangal men
roz ka rona laga hai apne saath
ham ne ankhen bandh liin rumal men
diida o dil ne kiya hai kaam band
thap hai karobar is hadtal men
is nigah-e-naz ki ek ek baat
hai hamare piir ke aqval men
dil pe saaya hai kisi sultan ka
varna kya rakkha hai is kangal men
Leave a Reply