koi me.ayar-e-mohabbat na raha mere ba.ad
har taraf aam hain ḳhasan-e-vafa mere ba.ad
silsila un ke sitam ka na raha mere ba.ad
badla badla sa hai dastur-e-jafa mere ba.ad
kaun pahnega gale men tiri ulfat ki kamand
kis ke sar hogi tiri zulf-e-dota mere ba.ad
hongi qurban tire ruḳh pe nigahen kis ki
chand ho ja.ega haale se juda mere ba.ad
sochta huun ki ba-in alam-e-betabi-e-dil
kaun mangega mohabbat ki dua mere ba.ad
daad chahenge miri tarah miTa kar kis ko
ishva-o-ghamza-e-andaz-o-ada mere ba.ad
Thokaren khati phiregi shab-e-yalda-e-firaq
ḳhuun ro.egi har ik taaza bala mere ba.ad
suuni suuni si hai har mahfil-e-iza-e-talabi
jaise duniya men koi gham na raha mere ba.ad
ḳhira ho jaati thi jis se nigah-e-sabr-o-qarar
un ke lab par vo tabassum na raha mere ba.ad
kya ḳhabar thi ki main ḳhud saath na dunga apna
gosht ho ja.ega naḳhun se juda mere ba.ad
fitrat-e-husn ko hai aise sitam-kash ki talash
jo vafa par bhi kare uzr-e-ḳhata mere ba.ad
zard kar dega use meri tabahi ka ḳhayal
rang laaya bhi agar rang-e-hina mere ba.ad
un ka divana to kahlana hai mushkil ‘basit’
koi divana agar ban bhi gaya mere ba.ad
Leave a Reply