miri ḳhatir koi naama koi paigham to ho
dil-e-muztar ko kisi taur se aram to ho
mujh se avara ko mil jaa.e magar ja-e-aman
aarzu hai tire kuche men kabhi shaam to ho
mauj-e-ḳhun sar se guzar jaa.e to kuchh baat bane
aaj zindan men bhi taz.in-e-dar-o-bam to ho
tapte sahra men bhi saaya kahin mil ja.ega
pahle ai dost tujhe jur.at-e-yak-gam to ho
be-gunahi ka mire qatl pe charcha hoga
koi bohtan tarasho koi ilzam to ho
gar tira lutf nahin tera taghaful hi sahi
aḳhirash meri vafa ka koi in.aam to ho
ungliyan uThti hain jis samt bhi jaate ho ‘habab’
na sahi kuchh magar ik sha.ir-e-badnam to ho
Leave a Reply