Kuldeep Kumar
vaqt ki chaak pe taḳhliq na.i chahti hai
zindagi aur zara kuza-gari chahti hai
ek dahliz hai jo paanv pakaḌ leti hai
ek laḌki hai ki jo apni ḳhushi chahti hai
aao ro len ki in ankhon se zara dhuup chhaTe
shaam ka vaqt hai ye miTTi nami chahti hai
pyaas ka khel dikhane men koi harj nahin
mas.ala ye hai ki is baar nadi chahti hai
ishq parvan pe hai aao bichhaḌ jaa.en ham
ye taqaza bhi hai duniya bhi yahi chahti hai
ik nazar faaqe pe baiThi hai ka.i hafton se
jaane kis yar-e-sitamgar ki gali chahti hai
Leave a Reply