phenke hue be-kar khilaune ki tarah huun
main baagh ke ujḌe hue goshe ki tarah huun
tu dil men utarti hui ḳhushbu ki tarah hai
main jism se utre hue kapḌe ki tarah huun
kuchh aur bhi din mujh ko samajhne men lagenge
main ḳhvab men dekhe hue raste ki tarah huun
saaya sa ye kis chiiz ka hai mere vatan par
main kyuun kisi sahme hue qisse ki tarah huun
main maan huun sata.i hui had darja bahu ki
aur beTe pe aa.e hue ghusse ki tarah huun
ho jaa.en kabhi ja ke vahin sindh kinare
baten koi do chaar jo pahle ki tarah huun
ab to kisi mahkar ki yadon ka safar hai
aur main kisi bhule hue qisse ki tarah huun
jis men koi dar hai na daricha na makin hai
us ghar pe laga.e hue pahre ki tarah huun
kya hogi talafi mire nuqsan ki ‘aḳhtar’
main qaid men guzre hue arse ki tarah huun
Leave a Reply