Syed Kashif Raza
bevafa tha to nahin vo, magar aisa bhi hua
vo jo apna tha bahut aur kisi ka bhi hua
teri ḳhushbu bhi tire zaḳhm men malfuf mili
tujh se gha.el bhi hua aur main achchha bhi hua
raah de di tire badal ko guzarne ke liye
varna ye dil to tiri pyaas se sahra bhi hua
shukr vajib tha ise teri mohabbat kaa, so dil
tera yusuf bhi raha, aur zuleḳha bhi hua
bhiiḌ vo thi tiri chaukhaT pe talab-garon ki
koi be-lams raha tera bulaya bhi hua
main ne tasvir bana.i to muḳhatib bhi hui
harf ko haath lagaya to vo zinda bhi hua
sajda-e-marg se mathe ko uThaya ik roz
main hua ḳhaak to phir ḳhaak se paida bhi hua
jitna ujḌa hai koi shahr-e-tamanna ai dil
kabhi lagta hi tha itna basaya bhi hua
Leave a Reply