agar kuchh bhi mire ghar se dam-e-ruḳhsat nikalta hai
uTha le jaa.e jis ka jo miri babat nikalta hai
ye virani si yunhi to nahin rahti hai ankhon men
mire dil hi se koi jada-e-vahshat nikalta hai
ajab hairat-sara hai ye jahan-e-tang-daman bhi
yahan to dil bhi dhaḌkan se dam-e-hasrat nikalta hai
ḳhush-arzani hui hai is qadar bazar-e-hasti men
giran jis ko samajhta huun vo kam-qimat nikalta hai
ik aisi basti-e-surat-garan men ab ke aaya huun
mujhe jo dekhta hai mera ham-surat nikalta hai
Leave a Reply