Saghar Mehdi
shab ke parde men ik avaz laga jaata hai
sham.a si koi andhere men jala jaata hai
lafz-o-ma.ani se juda saut-o-sada se mahrum
gham ki tahzib men kuchh yuun bhi kaha jaata hai
mere lahje men tashakkur ke siva kuchh bhi nahin
tere chehre ka ye kyon rang uḌa jaata hai
shukriya nik.hat-e-gul bu-e-chaman mauj-e-nasim
koi jhonka mire angan men bhi aa jaata hai
har ghazal kah ke ye mahsus hua hai ‘saghar’
dil men jo tha vahi kahne se raha jaata hai
Leave a Reply