ab koi aarzu nahin zauq-e-payam ke siva
ab koi justuju nahin shauq-e-salam ke siva
koi sharik-e-gham nahin ab tiri yaad ke baghair
koi anis-e-dil nahin ab tire naam ke siva
teri nigah-e-mast se mujh pe ye raaz khul gaya
aur bhi gardishen hain kuchh gardish-e-jam ke siva
ḳhvahish-e-arzu sahi hasil-e-zindagi magar
hasil-e-arzu hai kya soz-e-mudam ke siva
aah koi na kar saka chara-e-talḳhi-e-firaq
nala-e-sub.h ke baghair giriya-e-sham ke siva
rang-e-bahar par na bhuul bu-e-chaman se dar-guzar
ye bhi hain ḳhush-numa fareb dana-o-dam ke siva
mar ke hayat-e-javidan ishq ko mil ga.i ‘hafiz’
ji ke havas ko kya mila marg-e-davam ke siva
Leave a Reply