za.iqe paida tabi.at men lachak karte hain
aa tujhe vaqif-e-qand aur namak karte hain
aao chalte hain jahan sazish-e-ahbab na ho
dushmani ka ye safar dosti tak karte hain
vo jo insan ke hi bas men hai us par insan
jaane kis munh se shikayat-e-falak karte hain
khulne hi vaala hai bas andhi aqidat ka bharam
ham se kuchh log bahut chhan-phaTak karte hain
shirk to ḳhvab men bhi ham se nahin ho sakta
ham to ya-rab tiri qudrat pe bhi shak karte hain
Leave a Reply