mausam-e-gul aa gaya phir dasht-paimai rahe
ai junun lazim hai shaghl-e-abla-pai rahe
laakh mizrab-e-alam ki kar-farmai rahe
ai rabab-e-isq phir bhi naghma-pairai rahe
dekhna hai soz-o-saz-e-mausam-e-gul ki bahar
imtizaj-e-shoala-o-shabnam ki raanai rahe
aa saka lab tak kisi ke bhi na harf-e-muddaa
ham tamannai rahe vo bhi tamannai rahe
ham bhi dikhlaen jahan ko dil ke daghon ki bahar
aap ki hasil agar ham ko masihai rahe
justuju-e-yar men paaya na koi dam qarar
nikhat-e-gul ki tarah aalam men harjai rahe
raunaq-e-dair-o-haram ka ‘qadri’ kya puchhna
raushni ik shama ki do ghar men jab chhai rahe
Leave a Reply