ye jo har samt tire neze ki shohrat hai bahut
sach to ye hai ki mare sar ki badaulat hai bahut
chashma-e-chashm ke paani se nahin hoga kuchh
ḳhak-e-sahra hai ise ḳhuun ki zarurat hai bahut
main to ik aankh huun avaz se mujh ko na Dara
ye tire jalva-e-sad-rang ki dahshat hai bahut
but-e-ma.ani bhi ma.ani ke pujari bhi ga.e
aa ki ab ma.abad-e-alfaz men ḳhalvat hai bahut
ḳhaak hi shahr-o-bayaban ki agar daulat hai
to ye avara tira sahab-e-sarvat hai bahut
Leave a Reply