Guman paDta Yahi Hai Ki Rahbari Hui Hai

gumān paḌtā yahī hai ki rahbarī huī hai

ye apnī raah kisī raah se juḌī huī hai

hazār abr-e-mohabbat yahāñ baras bhī chuke

bas ek shāḳh-e-tamannā nahīñ harī huī hai

milī thī ham ko ḳhudā se bahisht ke badle

magar ye zindagī me.aar se girī huī hai

ufuq pe phailā huā hai firāq-e-yār kā rañg

udaas shaam mirī god meñ paḌī huī hai

uThā le haath mire chāragar ki is dil meñ

salīb-e-hasrat-e-ġham mustaqil gaḌī huī hai

Leave a Comment