guman paḌta yahi hai ki rahbari hui hai
ye apni raah kisi raah se juḌi hui hai
hazar abr-e-mohabbat yahan baras bhi chuke
bas ek shaḳh-e-tamanna nahin hari hui hai
mili thi ham ko ḳhuda se bahisht ke badle
magar ye zindagi me.aar se giri hui hai
ufuq pe phaila hua hai firaq-e-yar ka rang
udaas shaam miri god men paḌi hui hai
uTha le haath mire charagar ki is dil men
salib-e-hasrat-e-gham mustaqil gaḌi hui hai
Leave a Reply