phir sar kisi ke dar pe jhuka.e hue hain ham
parde phir asman ke uTha.e hue hain ham
chha.i hui hai ishq ki phir dil pe be-ḳhudi
phir zindagi ko hosh men laa.e hue hain ham
jis ka har ek juzv hai iksir-e-zindagi
phir ḳhaak men vo jins mila.e hue hain ham
haan kaun puchhta hai ḳhushi ka nahufta raaz
phir gham ka baar dil pe uTha.e hue hain ham
haan kaun dars-e-ishq-e-junun ka hai ḳhvast-gar
aa.e ki har sabaq ko bhula.e hue hain ham
aa.e jise ho jada-e-rif.at ki aarzu
phir sar kisi ke dar pe jhuka.e hue hain ham
bai.at ko aa.e jis ko ho tahqiq ka ḳhayal
kaun-o-makan ke raaz ko paa.e hue hain ham
hasti ke dam-e-saḳht se ukta gaya hai kaun
kah do ki phir giraft men aa.e hue hain ham
haan kis ke pa-e-dil men hai zanjir-e-ab-o-gil
kah do ki dam-e-zulf men aa.e hue hain ham
haan kis ko justuju hai nasim-e-faragh ki
asudgi ko aag laga.e hue hain ham
haan kis ko sair-e-arz-o-sama ka hai ishtiyaq
dhuni phir us gali men rama.e hue hain ham
jis par nisar kaun-o-makan ki haqiqaten
phir ‘josh’ us fareb men aa.e hue hain ham
Leave a Reply