Dil-E-Betab Ka Payam Liya

Sewak Nayyar

dil-e-betab ka payam liya

phir kisi ne mira salam liya

ruuTh kar ham se tu ne ai zalim

kis ḳhata ka hai intiqam liya

ho ke majbur josh-e-ulfat se

ham ne daman kisi ka thaam liya

phuul jhaḌne lage zaban se miri

jab kisi gul-badan ka naam liya

kaam aa.e na aql-o-hosh jahan

ham ne divangi se kaam liya

Dagmagate hue mire dil ko

us hasin ajnabi ne thaam liya

shiddat-e-ranj-o-gham men ai ‘nayyar’

ham ne jam-o-subu se kaam liya