Mila Bhi Zist Mein Kya Ranj-E-Rah-Guzar Se Kam

mila bhi ziist men kya ranj-e-rah-guzar se kam

so apna shauq-e-safar bhi nahin ghubar se kam

tire firaq men dil ka ajiib aalam hai

na kuchh khumar se badh kar na kuchh khumar se kam

hansi-khushi ki rafaqat kisi se kya chahen

yahan to milta nahin koi gham-gusar se kam

vo muntazir hai yaqinan hava-e-sarsar ka

jo habs ho na saka bad-e-nau-bahar se kam

bulandiyon ke safar men qadam zamin pe rahen

ye takht-o-taj bhi hote nahin hain daar se kam

ajiib rangon se mujh ko sanvar deti hai

ki vo nigah-e-sataish nahin singhar se kam

miri ana hi sada darmiyan rahi haael

vagarna kuchh bhi nahin mere ikhtiyar se kam

vo jang jis men muqabil rahe zamir mira

mujhe vo jiit bhi ‘amabar’ na hogi haar se kam

Leave a Comment