Poet
us sho.ala-ru se jab se miri aankh ja lagi
kya jaane tab se siine men kya aag aa lagi
ka.abe men vo zuhur hai jo but-kade men hai
ai shaiḳh munsifi se tu kahiyo ḳhuda-lagi
pa tak bhi dastaras na ho mujh ko ye rashk hai
aur tere haath men rahe qatil hina lagi
dushnam tum ne mujh ko jo di to main ḳhush hua
aur main ne di dua to tujhe bad-dua lagi
vo ghuncha-lab jo ḳhanda-zanan hai chaman men aaj
shayad gulon ke khilne ki us ko hava lagi
ḳhvabida baḳht ne vahin bedar kar diya
tere ḳhayal men jo ye aankh ik zara lagi
‘ghamgin’ jo ek aan pe tere ada hua
kya ḳhush ada use tiri ai ḳhush-ada lagi
Leave a Reply