mohabbat ibtida men hai jafa.en na-munasib hain
tumhare ruThne ki ye ada.en na-munasib hain
ye shayad umr aisi thi mohabbat ho ga.i mujh ko
magar is umr men itni saza.en na-munasib hain
tumhare shahr se jaana muqaddar tha so jhela hai
magar is men raqibon ki dua.en na-munasib hain
abhi se hijr ki talḳhi men mar ja.unga jan-e-jan
abhi mausam vafa ka hai jafa.en na-munasib hain
inhi tarikiyon men zinda rahne ka hunar sikho
diye ko mat jalao tum hava.en na-munasib hain
ye sher-o-sha.eri ‘da.em’ ye ishq-o-ashiqi ‘da.em’
miri maano tumhari ye ada.en na-munasib hain
Leave a Reply