Abhi Abhi Jo Falak Par Se Guzare Gae

Waseem Tashif

abhi abhi jo falak paar se guzare ga.e

tumhari aankh se aise ka.i sitare ga.e

tumhare honT se nikle har ek lafz ki ḳhair

ki jaise un pe gulabon ke phuul vaare ga.e

kisi ne niind men aa kar nahin chhua ham ko

ye baal ḳhvab men rah kar nahin sanvare ga.e

pahal pahal to vo honTon se dekhe jaate rahe

phir us ke ba.ad miri aankh se pukare ga.e

tire visal ki ḳhvahish kahin pe rakkhi ga.i

tire visal ke arse kahin guzare ga.e

magar vo lahr hamari taraf nahin palTi

agarche dhyan bahut us taraf hamare ga.e

tumhare jaane se kuchh ḳhaas to nahin hua bas

charagh rakkhe ga.e a.ine utare ga.e