Sameena Gul
shauq-e-didar ne kya kya na tamasha dekha
jan-e-man kaise bata.en tumhen kya kya dekha
zindagi aag hai aur aag ki ḳhatir ham ne
diip ki aankh men jalta hua chehra dekha
main ne lamhon men guzari hain hazaron sadiyan
vaqt ki dhuup men pighla hua dariya dekha
sub.h-e-raushan ne utari hain sitara ankhen
shaḳh-e-shamshad ne gulshan ka daricha dekha
raz-e-hasti men zamin saari tasavvur nikli
asman apne taḳhayyul ka sahifa dekha
dagh-e-daman ko uTha.e hue phirti hai hava
dhuul hi dhuul hua saara vo rasta dekha
gul ki ankhon men machalti hui yaden us ki
rang-o-ahang se badalta hua shisha dekha
Leave a Reply