sabze se sab dasht bhare hain taal bhare hain paani se
mere andar ḳhali-pan hai kis ki be-imani se
ab ke apni chhat bhi khuli hai divaron men dar hain bahut
barish dhuup hava jo chahe aa jaa.e asani se
sachcha.i hamdardi yaari yuun ham men se chali ga.i
jaise ḳhud kirdar ḳhafa ho jaa.en kisi kahani se
chehre par jo kuchh bhi likha hai vo sab ek haqiqat hai
a.ina kya dekh rahe ho tum itni hairani se
taqriren deti hain dilase ya nafrat phailati hain
tu main aur tariḳhen lekin banti hain qurbani se
ḳhuun ke rishte ḳhuun men Duube ek zamin ke TukḌe par
sadiyon ka apna-pan bhule ham kitni asani se
Leave a Reply