ḳhud apne aap se ye gila umr bhar kiya
kaise tire firaq ka mausam basar kiya
minqar se hava ne likhi dastan-e-hijr
yuun harf-e-mo’tabar ko bhi na-mo’tabar kiya
kaisi hava chali ki ma.an barishon ke ba.ad
har be-gulab rut ne gulistan men ghar kiya
ḳhud ham ne kaaT kaaT di zanjir saans ki
ḳhud ham ne zindagi ka safar muḳhtasar kiya
be-ab a.inon ko bhi ik aab baḳhsh di
har chand be-hunar the ye kar-e-hunar kiya
saare sutun ret ki buniyad par uTha.e
ham ne kis ehtiyat se ta.amir ghar kiya
duniya simaT ke ek hi nukte men aa ga.i
ham ne jab apni zaat ke andar safar kiya
tha miir ji ko izzat-e-sadat ka ḳhayal
ham ne suḳhan ko jins-e-dukan-e-hunar kiya
mauqa.a-shanas qasr-e-havas men pahunch ga.e
tai marhala uḌaan ka be-bal-o-par kiya
ḳhushbu mire badan se ḳhud aa kar lipaT ga.i
‘mohsin’ ye kis dayar se main ne guzar kiya
Leave a Reply