dekh kar dagh-e-dil-e-raushan ko ham
bhuul baiThe lala-e-gulshan ko ham
ab tira daman hai aur dast-e-junun
chhoḌte hain apne pairahan ko ham
ho ga.e paband-e-taslim-o-raza
ab jhuka.e rakhte hain gardan ko ham
jis ke navak se hua dil ka shikar
bhulen kyunkar aise tir-afgan ko ham
gard-e-gham jab se ki baiThi ham-nashin
muddaton jhaTka kiye daman ko ham
ham-safiro bas yahi qismat men tha
ro.e gulshan ham ko aur gulshan ko ham
ishq se ‘mas.ud’ aajiz ho chuke
ab na denge dil kisi pur-fan ko ham
Leave a Reply