shajar hain ab samar-asar mere
chale aate hain daavedar mere
muhajir hain na ab ansar mere
mukhalif hain bahut is baar mere
yahan ik buund ka muhtaj huun main
samundar hain samundar paar mere
abhi murdon men ruhen phunk dalen
agar chahen to ye bimar mere
havaen odh kar soya tha dushman
gae bekar saare vaar mere
main aa kar dushmanon men bas gaya huun
yahan hamdard hain do-char mere
hansi men taal dena tha mujhe bhi
khata kyuun ho gae sarkar mere
tasavvur men na jaane kaun aaya
mahak utthe dar-o-divar mere
tumhara naam duniya janti hai
bahut rusva hain ab ashar mere
bhanvar men ruk gai hai naav meri
kinare rah gae is paar mere
main khud apni hifazat kar raha huun
abhi soe hain pahre-dar mere
Leave a Reply