Dilshad Naseem
na jaane kaisi mohabbat ke va.ade raat jale
jala jo ḳhat to sakhi mere donon haath jale
guzara din jo udasi men shaam kahne lagi
bahut akeli huun main koi mere saath jale
palaT ke haal na puchha fareb-karon ne
ye dil ke saath mire ek aur ghaat jale
ganva ke baiThi huun main aaj apna sabr-o-qarar
ki saath chand ke meri tu saari raat jale
main us kahani ka kirdar huun ki jis men sada
vafa ko likhne se pahle hi mera haath jale
ḳhizan ke ba.ad baharon ki raah dekhi to
ye haif sad ki miri aarzu ke paat jale
hai pyaas aisi ki ‘dilshad’ aansu tak hain piye
ki tere hijr men dil mera baat baat jale
Leave a Reply