qisse bachpan ke jo ik roz suhane nikle
dushmanon men hi ka.i dost purane nikle
kar liya tark-e-ta.alluq ka irada to use
meri har baat men phir kitne bahane nikle
sukhti kasht pe ik roz jo barsa paani
nanhe bachche sabhi gaanv ke nahane nikle
qafile yadon ke yak-laḳht dabe paanv se
meri ankhon se miri niind churane nikle
sham.a ik samt jali aur udhar parvane
apne hi ḳhuun ke dariya men nahane nikle
ruḳh jo pazhmurda kisi shoḳh ka dekha to laga
kaise guzri hai shab-e-gham ye batane nikle
‘nazr’ phir aaya hai ik rasm nibhane ka din
saj sanvar ke sabhi ravan ko jalane nikle
Leave a Reply