har dam ki kashmakash se nikal rasta badal
ab aur un ke saath na chal rasta badal
ye ḳhalfishar-e-zehn ye ḳhadshe ye hujjaten
in sab ka bas hai ek hi hal rasta badal
naḳhvat-parast logon ko chhoḌ un ke haal par
vaqt un ke ḳhud nikalega bal rasta badal
sochon men jin ki taaza hava ka guzar nahin
kar denge tera zehn bhi shal rasta badal
ye teri zindagi hai guzar apne Dhang se
sanche men dusron ke na Dhal rasta badal
tu jin ka ham-qadam hai ye be-mehr log hain
honge tire ye aaj na kal rasta badal
nuqsan degi tujh ko bahut gu-magu ‘na.im’
taḳhir kar na ek bhi pal rasta badal
Leave a Reply