Raheel Farooq
dil ke afsane ko afsana samajhne vaale
ḳhuub samjhe mujhe divana samajhne vaale
dekh kar bhi na kabhi jaan sake husn ka raaz
ishq ko ilm se begana samajhne vaale
aa tujhe zabt ke israf se agah karun
aah ko dard ka paimana samajhne vaale
shaiḳh jagir samajhta hai ḳhuda.i ko bhi
ham ḳhuda ko bhi kisi ka na samajhne vaale
qais se dasht men kya ḳhuub mulaqat rahi
log milte nahin rozana samajhne vaale
ghar ko lauTe bhi to bikhre hue lauTe ‘rahil’
ḳhud ko ḳhak-e-rah-e-janana samajhne vaale
Leave a Reply