Tumhaara Rang Rang-E-Asman Jaisa Badalta Hai

Ghayas Mateen

tumhara rang rang-e-asman jaisa badalta hai

kisi ko chahne vaala kahin itna badalta hai

saba shabnam shafaq ruḳhsar gul mahtab in sab ka

tumhara naam leta huun to kyuun chehra badalta hai

saba guftar shirin lab sitara chashm hain to kya

badalte ham bhi hain jab samne vaala badalta hai

kabhi jaati nahin jangal ki bu sandal ke paikar se

ki surat ke badalne se kahin rishta badalta hai

ye shahr-e-be-sada andar se shahr-e-arzu nikla

dhuan har-dam yahan bujhte charaghon ka badalta hai

utarte vaqt paani men zara ye dekh lena tha

ki andar beach men ja kar yahi dariya badalta hai

raho divar ke saa.e men lekin dekhte rahna

hamesha ruḳh yahan divar ka saaya badalta hai

suḳhan rasta lakiron se nahin lafzon se raushan hai

lakiren piTne se bhi kabhi rasta badalta hai

‘matin’ aao chalen ḳheme ki janib ik zara so len

vo dekho sub.h ka taara libas apna badalta hai