Sufi
agar kuchh e’tibar-e-jism-o-jan ho
abhi kuchh aur mera imtihan ho
mujhe darpesh hai bas ek manzil
ki tujh se baat ho lekin kahan ho
jise mauj-e-bala chume musalsal
miri kashti ka aisa badban ho
kahan tak surat-e-imkan nikalun
agar har baar mehnat raegan ho
mire khvabon ki vo be-nam jannat
zamin-o-asman ke darmiyan ho
mire ehsas ke atish-fishan ka
agar ho to mire dil tak dhuan ho
agar ‘aghaz’ hai chup-chap sahil
samundar ki tarah tum be-karan ho
Leave a Reply