udaas bas adatan huun kuchh bhi hua nahin hai
yaqin maano kisi se koi gila nahin hai
adheḌ kar si raha huun barson se apni parten
natijatan DhunDne ko ab kuchh bacha nahin hai
zara ye dil ki umiid dekho yaqin dekho
main aise ma.asum se ye kah duun ḳhuda nahin hai
main apni miTTi se apne logon se kaT gaya huun
yaqinan is se baḌa koi saneha nahin hai
to kya kabhi mil sakenge ya baat ho sakegi
nahin nahin jaao tum koi mas.ala nahin hai
vo raaz siine men rakh ke bheja gaya tha mujh ko
vahi jo ik raaz mujh pe ab tak khula nahin hai
main bughz nafrat hasad mohabbat ke saath rakhun
nahin miyan mere dil men itni jagah nahin hai
chahar janib ye be-yaqini ka ghup andhera
ye meri vahshat ka inḳhila hai ḳhala nahin hai
usi ki ḳhushbu se aaj tak main mahak raha huun
vo mujh se bichhḌa hua hai lekin juda nahin hai
likha hua hai tumhare chehre pe gham tumhara
hamari halat bhi aisi be-majra nahin hai
ye taza-kari hai tarz-e-ehsas ka karishma
mire lughat men to lafz koi naya nahin hai
naya hunar siikh fi-zamana ho jis ki vaq.at
suḳhan ki nisbat se ab koi puchhta nahin hai
jise ho ‘irfan’-e-zat vo kya tiri sunega
o naseha chhoḌ de koi fa.eda nahin hai
Leave a Reply