Junun Ki Rakh Se Manzil Mein Rang Kya Aae

Baqi Siddiqui

junun ki raakh se manzil men rang kya aa.e

mata-e-dard to ham raah men luTa aa.e

vo gard uḌaa.i kisi ne ki saans ghuTne lagi

haTe ye raah se divar to hava aa.e

kisi maqam-e-tamanna se jab bhi palTe hain

hamare samne apne hi naqsh-e-pa aa.e

numu ke bojh se shaḳhen na TuuT jaa.en kahin

tum aao to koi ghuncha khile saba aa.e

ye dil ki pyaas ye duniya ke fasle ‘baqi’

bahut qarib se ab to koi sada aa.e