mahdud-nigahi ke sanam TuuT rahe hain
tarik ujalon ke bharam TuuT rahe hain
is daur ki badli hui raftar ka aalam
shishon ki tarah naqsh-e-qadam TuuT rahe hain
tishna hai mira jaam to kuchh gham nahin saaqi
ye gham hai ki rindon ke bharam TuuT rahe hain
is raaz ko arbab-e-siyasat se na puchho
kyuun rabta-e-dair-o-haram TuuT rahe hain
ye ziist hai ya riit ka kamzor gharaunda
ban ban ke yuun hi sadiyon se ham TuuT rahe hain
halat ka ye ruḳh bhi ‘hayat’ aap samajh len
kyuun zulm ba-andaz-e-karam TuuT rahe hain
Leave a Reply