tha pas-e-mizhgan-tar ik hashr barpa aur bhi
main agar ye janta shayad to rota aur bhi
paanv ki zanjir girdab-e-bala hoti agar
Dubte to sat.h par ik naqsh banta aur bhi
andhiyon ne kar diye saare shajar be-barg-o-bar
varna jab patte khaḌakte dil larazta aur bhi
rauzan-e-dar se hava ki siskiyan sunte raho
ye na dekho hai koi yaan abla-pa aur bhi
har taraf avaz ke TuuTe hue girdab hain
raushni kam hai magar chalta hai dariya aur bhi
sirf tu hota to tera vasl kuchh mushkil na tha
kya karen tere siva kuchh ham ne chaha aur bhi
aarzu shab ki masafat hai to tanha kaTiye
din ke mahshar men to ho ja.enge tanha aur bhi
Leave a Reply